[Cerita Tegalan] Jaman Molak-Malik

  Kamis, 31 Desember 2020   Dwi Ariadi
Mohammad Ayyub, Sastrawan Tegalan

AYOTEGAL.COM -- Kadingaren Mane' kayong betah nonton tipi. Wayah esuk sedurunge' mangkat pasar kelawan bengi wayah bar isya. 

Sing didemeni acara brita. Brita sing lagi rame virus corona sangsaya medeni. Gal dina ana bae sing kena covid sangalas. Padahal ora kabeh kena covid sangalas. 

Wong lara biasa,wuteng mules,telat mangan attawa mah ya jare covid sangalas. Amak-amak diarani ketular corona lan positip corona.

Kiye sing dadi Mane' eram. Wingi ana tokoh agama. Wonge' terkenal loman larane' lara jantung diomongna corona.

Kluargane' digedag-gedag kon cepet- cepet dikubur. Edan  ah ! wayah jam telu kon nggali kuburan. Sapa sing gelem ? Ana maning tokoh parte. Asline' tah lara biasa wong deweke' bolak-balik umah sakit. 

Jebul barang pati monine' kena corona. Sing medeni 
mayiti digawa langsung maring Pejaratan. Sing nggawa peti mayite pakeane' rapet. Sholate' nang nduwur kuburan.Serem beleh ? Wong layad be beleh olih. Alasane' mengko akeh wong ngumpul. Kuwatir ana kluster anyar.

AYO BACA : 24 Titik Ruas Jalan Kota Tegal Ditutup saat Malam Tahun Baru 2021, Ini Rute yang Bisa Dilalui

Cendeke' Mane kayong beleh ridlo. Maksude 'apa sih apa-apa kudu corona. Tujuane' apa mbok ? Durung brita wingi enem bocah nom dipateni polisi. Alasane' wani karo polisi. Ngrebut senjatane'. Mbuh sing bener sapa, gon ati cilike' Mane' ora percaya acan. Maling dudu,garong ya ora. 

Apamaning jare teroris kayong laka potongan. Sangertine' Mane' bocah-bocah enom,bocah-bocah sing kudu dijaga,dilindungi lan diayomi. Luwih-luwih polisi sing dadi tanggungjawabe'.

Mane' dadi kemutan Bujang,bocah mung siji-sijine'. Ora sadar Mane' mblebes mili. Gon matane' ngecembong banyu. Mili gon pipi tres tiba siji-siji maring slendange".

Weruh-weruh Bujang nyodori serbet tangan karo mujar.
   " wis ne' aja nonton brita bae. Mane' ora kuatan. Mending nonton hiburan apa sinetron.Tolih kena nggo ngurangi sutris".
    " sikah ! bocah ngerti apa wong tuwa pan diajari..nehi ya.." jawab Mane' nandes.

    ' brita ya prelu Jang eben tambah ngerti,weruh keadaan sebenere' ora jare-jare. Ora gampang dibodoni. Kaya kiye soten Mane' ora ketinggalan brita. Mata dadi melek weruh kabeh. Jaman kowen esih nyusu, Mane' langganan nonton brita. Senajan wong pasar aja kosih ketinggalan brita. Brita apa bae. Sing apik diomongna sing ala uga diomongna. Siji isine' aleman sijine' kritikan. 

Nang basa seki : pentelengi ! Mane' kedawan-dawan omongane' nggawe Bujang eram. Kadingaren ! Ngimpi apa ? Ora pranti-pranti Mane' bisa ngomong kaya kuwe. Pisan maning Bujang kur bisane' ngecap-ngecap lambe'

AYO BACA : Majelis Hadroh Brebes Salurkan Bantuan Masker hingga Vitamin ke Warga Terdampak Covid-19

   " ck..ck..kayong ajib Mane' bisa ngomong pentol nemen. Enyong kalah set kyeh." batin Bujang. Tapine' egin bae penasaran. Wong ngartine' Bujang Mane' nguplek adol dagangan gon pasar. Waktune' kayong entong nggo ngurus dagangan. Bengi kiye kebukten Mane' ora kalah karo emak-emak jaman now. Pinter golet pangan tapine' ora tau ketinggalan brita sing lagi viral.

Bisa bae kuwe sebabe' Mane dodolan tetep jalan lan wis dilakoni sampe' seki. Pribasane' wayah rendeng apa wayah panas ngentak pisan tetap ajeg beleh oyag acan.

   " kyeh Jang mene njagong",Mane' prentah. Bujang nurut bae kaya kena sihir.
   " rungokna Mane' pan crita." Bujang mantuk.
  " kowen ngarti jaman seki nganeh-nganehi.."
  " nganehi pimen,ne'? Bujang nyela.
  " his ! aja dipotong sit. Mane' ngomong durung pragat !" Suara Mane' tambah galak. Matane' malik. Adong wis kaya kuwe tandane' kudu getem bae alias dirungokna temenan. 

   "  jaman seki Mane' ngrasakna jaman molak-malik. Sing bener disalahna. Sing salah dianggep bener. Wong lara mah monine'  kena covid sangalas. Ora doyan mangan adong mangan muntah jare kena corona. 

Wong kuwe mung klebon angin kaya tangga dodolan Mane' nang pasar. Asline' wong Debong. Durung crita-crita nang hapene' kowen akeh sing ngawur. Ditambah maning wong ka pada laka syukure' wis mangan duit gaji esih kolu nyunyad jatahe' wong kere'.Semana uga crita bocah enem mati nang polisi gawe getun Mane'. Enyong dadi kelingan kowen Jang."

   " Jang..Jang..?" Mane' nglinguk. Tobleg-tobleg bocah dijak ngomong malah ngorok. Tapine' Mane' meneng ora kolu mbugah anak lanange'. Karo nggeleng-nggelas endas Mane' mlebu kondonge'.

Mohammad Ayyub, Sastrawan Tegalan

AYO BACA : Waspada, Ini 3 Titik Rawan Kerumunan di Kota Tegal saat Malam Tahun Baru 2021

  Tag Terkait

   Ayo Bagikan!
Ayo Respon
   Komentar

Komentar sepenuhnya menjadi tanggung jawab pribadi seperti diatur dalam UU ITE

Komentar